Mit 16ni serstmal ufemene Rennvelo ghocket und grad begeisteret wie eifach & schnell dases chan vorwärts gah.  Mini  Pulskurve isch zwar immer steiler als d’Astieg ufem Höheprofil gsi und trotzdem: Sleep, cycle, eat, repeat – en Tagesablauf wonich zfride wär demit, wenns da nid no so vill anders ztue gäbt… wie zum Bispil en Ortsschildsprint oder es Präsidium im RCNW.

Vom ahstrengende fahre im Gegewind zum gmüetliche Windschättele im Verein. Es zämä si mit vielne Veloenthusiaste, gueti Gspräch, en Ustusch vo Tourene und viel Erlebnis ufem gliebte Drahtesel - die und no viel wiiteri Gründ hend mich dezue bewegt de ersti Rennvelo-Verein in Nidwalde is Lebe z rüefe. Als Vize-Präsident wett ich de Verein wiiterenwtickle, s Geschehe rund ume Kanton Nidwalde beläbe und vieli wiiteri Persone vo dem tolle Sport la begeistere lah und i de Gnuss vo dere Passion und Freiheit z cho.

​Ich chami nur sehr genau an mis erst Velo-Trickot erinnre: Gelb mit dunkelblauem LCL-Schriftzug – ab dischum Zitpunkt hättis eigentlich sellu klar sii, dasi ufum Rennvelo landu.
Aber nah mehrere Jahr ufum Mountainbike und ra lengeru Pause, hets denn erst letscht Jahr wieder richtig Klick (ine Pedal) gmacht; 
und sit dem hani endlich en Üsred mini üsgeprägt Gummibärlisucht z rationalisieru oder vili geits mer öi drum d schön Zentralschwiz ufum Velo z erkundu.

Viel Fründe vo mier verbringed seeeehr viel Zit uf ihrem Rennvelo und dass ich all immer mal wieder chan gseh, hani eifach au demit ahgfange. Bi gueter Gsellschaft, schönem Panorama und aschlüssendem Kaffi hed mer definitiv kei Sorge meh.  Als Gnussmensch die perfekti Kombi fürd Freizit! Mini neu gwunneni Lideschaft möcht ich vor allem de junge Mensche witerge ih dem mer cooli Events ufd Bei stelled, sodass au sie so Spass amne Hobby döffed ha und's ned immer nur um Leistig muess gah. 

Werom ech gnau zom Rennradfahre cho bi, weiss ech sälber ned ganz gnau. Wohrschindlech het mech de Veloboom eifach metgrisse, und die epische Toure vo minere Cousine hend mech immer mega beeindruckt. Irgendwenn han ech mer denkt: Das chani doch au. Sithär het mech s’Velofahre voll packt, und s’Gfühl vo Freiheit uf em Velo begeistert mech bis höt. Die Liideschaft möcht ech au i minere Tätigkeid bim RCNW iibringe. Näbem Engagement bim RCNW schaff ech hauptbrueflech als Instrumentallehrperson für Gitarre und zusätzlich imene Nebenpensum bi Dirtysox. Ech be Vater vo eim Sohn und läbe z Hergiswil NW.

Velofahre isch fir mich meh as nur Fortbewegig – es isch Freiheit, Uisgleych und Energiequellä. Ob mitem E-Bike zur Arbet, gmietlich mit de Tochter oder sportlich ufem Rennvelo: 
dNatuir i de Zentralschweyz macht jedi Fahrt zum Erläbnis! Die Begeischterig wett ich im RoadCycling Club Nidwalde weytergäh und mit anderne teile.